|
Vistu ca simu cca e un sapimu quantu
'mmuttà e tirà n'attocche sa catreja.
Davanti a vucca currunu i 'mmursielli,
s'addi
scippà e 'mmuccari ccu riguardu
e mazzicari quantu avaste e sazzije,
senza peniari e senza ni sguajari
cediennu si si pò puru alla gula
du pocu ca t'arrive du tugua o i l'atri.
China fa chistu tene assaju giudizziju,
tantu
ti piglie quantu u stessu dune,
na mana stenne mentri l'atra arrunchje
e
a prima arrunchje quannu l'atra stenne,
ca duciu e amaru si ponu apparari.
Càpite spessu ch'a natura sbaglie:
nu vrazzu luongu e natru da ristujna
a certi ci strumente alla venuta.
Sa cosa ca pu un'fusse tanta grava,
s'a curta e a longa cumu vene vene
usassunu ppe dari e ppe pigliari.
E imbeci si cristiani, c'un su fissi,
capiennu cu difettu po giuvari,
s'adusunu ppe dari e ppe pigliari:
pigliari sempri ccu llu vrazzu luongu
e ccu llu curtu, forsi, si pò dari.
Ppe chillu ca mo dicu te aggualari
ccussì ti le teniri e c'è campari.
'Mmienzu all'amici i chisti cci 'nne ancunu
e intr'i parienti spessu cchjù di unu;
s'un vo campari cumu nu rimitu
sa cosa ti le 'mpingiri alli carni
pensannu ch'a natura l'ha purtatu.
Cumu u sciroccu porte cavudu e rina
cumu u libiciu vienti maru e timpesta,
cumu u grecalu ti rifrische a lugliu,
cumu ti conze funnu a rivutura(1),
cumu nu vientu segue alli fasuli,
cumu i na rapa u'nasce nu citrulu;
o ppe l'usanzi e ppe la riscinnenza:
cumu na fera porte lli pinozzi,
cumu a natali mangi nu turdillu,
cumu a vijelia fa pasta e mullica,
cumu intr'i jorni grassi c'è frittata,
cumu a nu gollu fort'a vucia desce,
cumu na casa u patru du alli figli,
e cumu i figli ognunu a vo pigliari,
e frati un sunu cchiù ma su nimici.
Ppe chillu ca te dittu te aggualari
ccussì ti le teniri e c'è campari.
Iju ni canusciu tanti a tutt'i vanni,
e datu ca mi friculijnu i sijenzi
ricapite ca viju sempri sa cosa
quannu si va allu barru e allu bancunu.
Si tu si stancu cca signiti u rigu
e doppu vieni quannu tijeni voglia
ppe tri minuti ppe sapì chi fanu
davanti a na tazzulla quannu è chjina.
S'ancunu arrive e dice "pagu iju",
ca c'è successu ancuna cosa bona,
l'amicu ccu lli vrazzi luonghi e curti
è sempr'u primu avantu allu bancunu,
s'acchiappe llu cafè senza crianza
a dua vuccati u manne vers'a panza
e subitu si minte fora a porta
i latra parta idduvu teninu a cassa
pensannu ccu la capa e ccu la sacca:
"s'avisse di scurdà chin'ha offertu
e ppu mi truovu sulu allu bancunu?"
Succede imbeci spessu ca si inziemu
e inziem'u gruppu va vers'u garzunu
senza c'ancunu dice "oj pagu iju";
a chillu ccu lli vrazzi luonghi e curti
nu tremulizzi u piglje sutt'i gammi
e saglie chianu chianu vers'a panza,
u stomicu si stringe da pagura,
u sanguo scurre pocu versi u coru,
rape lli gammi ppe stari all'impiedi
ca capa a persu a mera e la ragiuna.
M'a mana ca si trove drint'a sacca,
tuccannu u ffierru ca cci du lla vita,
na vampa ca summarche la pagura
manne alla capa tantu quant'avaste,
i sienzi si ricogliunu ppe tiempu
ppe fa na cosa ca sempr'illu a fattu:
pigliar'a tazza alla vigna di fissi.
S'a scena vo gustà te stà alla porta
e vvidi ch'i persuni vanu avanti,
si spannunu alla faccia di buttigli
guardannu i gucci jiri drint'a tazza;
u tiziu ccu li vrazzi a dua misuri
arrive sempri l'urtimu alla fila
assaj luntanu iddu'è la machinetta;
a manu a manu chi cafè su pronti
i cchiù vicini su serbuti i primi
e allu fricunu l'urtimu ci'attocche.
Quannu da tazza u manicu si piglje
cumincie nu riminu ccu llu vrazzu
cu tiempu eddi passà ppe un'glj alla cassa;
uocchju unu u pirchiu jette dintra a tazza
e rote llu cafe cchiù di tri voti,
ccu latru smicce china ancora vive.
Vacanti i tazzi tannu illu cumincie,
si vive llu cafè c'ormai è friddu
e guccia a guccia scinne drint'a panza;
intantu ancunu minte manu alla sacca,
ca sempre u fissu i turnu va alla cassa,
e tannu a tazza pose allu bancunu
e appriessu all'atri descie fora a porta.
Puru sa vota ha'rrizzicat'i sordi,
ma su rimasti drint'a sacca sugua;
s'i tocche e vide si ci sunu tutti,
c'un si sa maj ancunu fusse cadutu,
s'acquete a lasse arrietu sa pagura
ca pu cchiù avanti ancora sa ritrove;
n'atru cafe pur'oj illu ha futtutu
cumu sa fari alla vigna di fissi.
Vuliri o nu vuliri namu parrari
i sa miseria i si persuni angrati
ca pirchj sunu e su puru cafuni
campunu sulu ppe allisciar'a rroba.
Pu vene jurnu ca parecchi pisi
anu mmuttari allu quartu girunu(2),
c'ammenu chilli du girunu prima(3)
a vita a gula e panza s'anu scialata
puru ca mo su ammuollu intr'a latrina.
|